الجواز عام 2050
تخيل وانت قاعد كده بتقرا كتاب رومانسى
والا بتتفرج على فيلم عربى ولا هندى رومانسى ( يشيل )
وبتفكر وسرحان فى فارسه احلامك
اللى هتيجى تاخدك على الحمار البنفسجى
(اللى هيطير بيك ويوقعك راقبتك تتكسر )
تلقى الست الوالده داخله عليك وبتقولك عوزه اكلمك ياواد فى موضوع
وانت تتخض وتخاف وتقولها خير ياماما
تقولك خير ياحبيبى عندى ليك خبر يفرحك
وانت زى الاهبل
( تتنطط وترقص وتسال امك خير خير )
تقولك جارتنا ام برقوقه جايه تخطبك للبت برقوقه
بنتها وانت خلاص كبرت وحلويت
والبنات بقت تتحدف عليك
وانت بقى تتكسف وتوطىء راسك فى الارض
( مسكوف ياعين ماما -- سيد امه ياناس )
وتقول للحاجه الوالده اللى تشوفيه ياماما
تقولك مامتك البنت حلوه ومؤدبه
ووظيفه كويسه ومرتبها عالى
ومن عيله محترمه ومن الشغل للبيت
ومن البيت للشغل
ولا بتدخن ولا بتروح ولا بتيجى
وانت تقول للحاجه وانت مكسوف
طب هى شفتنى فين ياامى وانا دايما قاعد فى البيت
تقولك امك شفتك وانت بتشترى الخضار من السوق ياضنايا
( يالهوى على الجمال خضار كمان )
وجايه هى وامها يشوفوك يوم الخميس
طب ياماما وبابا ايه رايه ؟
ابوك يابنى محتاس فى الطبخ وغسيل الصحون
الله يعينه سيبه فى حاله ( الله يرحمك يارجوله )
وتقول لمامتك الحاجه اللى تشوفيه ياماما اعمليه
انا تحت امرك وتطلع جرى على اوضتك تتنطط
تنطيط ادام المرايا وتلف نص لفه يمين ونص لفه شمال
وتغنى وتعملى فيها سعد الصغير
( هتجوز --- هتجوز )
ويجى يوم الخميس وتروح للكوافير الرجالى
وتضرب شعرك هاى لايت وتشيل حواجبك خالص
( نيولوك بقى يا شباب )
وتروح بيتكم وتلبس القميص والبنطلون
اللى فصلتهم عند عمو عبده الترزى
وتلبس الجزمه الاجلسيه الملمعه
( يلهوى على الجمال -- ايه ده عريس اجمل من جون ترافولتا )
وتنزل بسرعه اول ماتعرف ان برقوقه والست والدتها
الحاجه فى صالون بيتكم وبابك يقولك خد العصير
وادخل سلم على عروستك وحماتك
وانت تتكسف وتقول لبابك انا مكسوف يا بابا
( مكسوف -- مكسوف -- مكسوف )
وتاخد صينيه العصير وتدخل ترمى السلام
( ياسيدى مسي علينا )
واول ما العروسه تشوفك تعاكسك بكلمتين حلوين
وانت ياعيني عليك تتكسف وتقدم العصير وتسيبهم وتطلع تجرى من الفرحه
( عروسه يابوووى )
واخواتك بقى يسالوك شكلها ايه تقولهم حلوه حلوه
وعسل عسل عسل
امورة امورة امورة خالص
وفجاه الست الحاجه والدتك تقراء معهم الفاتحه
وتسمع انت واخواتك صوت زغروطه تجنن من بابك
خارجه من المطبخ
( لووووووووووولى )
وفجاه وبدون مقدمات تتفاجىء بدخول اختك
اللى خارجه من قضيه سطو مسلح وتجاره هيروين
وبتقول فى ايه بيحصل من ورا ضهرى
(الجوازه هتتفركش ياحلو )
يقوم السيد الوالد شكر الله سعيه يهديها بكلمتين
ويقولها اخوكى بيتخطب تصرخ بصوتها اللى بيسمع
اول الشارع عندكم وشفت اخويا فين البت دى
هو اخويا بيخرج لوحده فى الشارع من ورايا
( مش بقولك الجوازه هتبوظ عوضك على الله )
والدك الغالى يحاول يهديها ويقولها لا يابنتى ده جايه
على السمع وسمعه اخوكى اللى زى الفل
( تخرس البت وتتكتم وتسكت خالص )
وتستعد بقى ياجميل للخطوبه والجواز
وتتجوز برقوقه وشهر والتانى برقوقه تغضبك
تلم هدومك وتروح غضبان فى بيت الست الوالده
والوالده تصلح بينكم
وتعيش باقى حياتك مع برقوقه فى تبات ونبات
الخميس يونيو 25, 2009 2:13 pm
